Thursday, November 24, 2022

十九

昨晚看了《給十九歲的我》由頭到尾都眼濕濕同埋感動。(其實係全程都想喊同埋內心激動,點解我要寫得含羞啲 XD 芝都係咁話,但我覺得我哋想喊嘅原因唔同) 

電影節奏明快,無煽情,唔陳腔濫調。
同埋唔好以為名校女仔就無故事,一定一帆風順咁。

長大真係一件好驚心動魄的事。導演張婉婷,跨越十年,真實貼身地追蹤六七個女仔,由中一至大學的故事,當中有新移民的小朋友;有自小立志要當警察的;也有成為港隊運動員的....
 
個個都既純真又成熟。

就算自細被打,爸媽都改嫁改娶,丟低女兒一個寄人籬下,抵受別人的眼光,但她都希望十九歲的自己會變成孝順。

一個女孩真的選擇了停學,去找她心愛但離棄了她的媽媽生活。

但也有好多大人好有愛,副校長,校長,嘅部份都好感動。

故事中段所有同學仔都唔想再拍落去,也有如實紀錄。

有個女仔中三時仲打張婉婷crew 部機話唔好再拍喇。

電影今日上映喇,我見高先都有。大家都去睇啦。(但朋友話原來所有場都滿晒,希望會加場啦)

雖然係幾個女仔嘅故事,但也是香港動盪的十年的側寫,2012, 2014, 2019, 我覺得所有人都會有共鳴的。

謝謝突破的特別邀請場。

我今次有親自去謝謝也在場的其中一個同學和導演。
要被追拍整個teenage 是很大犧牲呀。

她小時很反叛的(真係,以後嘅事,充滿未知)她還給了我一個擁抱。

而作為導演,要十年繼續拍,都係十分之大嘅堅持。

奉獻一生默默做教育嘅人真係好偉大好值得尊重

----------------------------
同埋我覺得,有時就算好compassionate 的老師,喺everyday 繁忙教務之中,有時真係無時間look beyond 究竟點解學生會有某啲行為問題。戲中的副校長是個好溫柔的人,從她看待學校選舉,社會運動,或者係make 的comment,都覺得校長副校長好有愛。

但她也是看電影才知,其中一個反叛的同學阿佘,原來中一時自己在家食飯,媽媽打電話來,他們以普通話對話,為她安排了時間表,rules 就一大堆,但自己卻是缺席的。小時還用鐵衣架打她,而爸爸則在深圳工作。

後來她被同學認為她援交,什至depressed 得不能上學。學校好多人講佢壞話 ,她對班完全無歸屬感。但她的best friend Shirley, 咁多年對佢都係不離不棄, 是後來的head prefect, 一直坐喺呢個同學隔離,好多時暗中幫佢。

又有影佢哋DSE 放榜, 幾個主角都係危危乎咁,但呢個同學個best friend係全部科都5* 同埋5**
當之前呢班小妹妹個個都話要讀 law, 讀放射性治療(u know small kids, all say 要賺錢,但用最hea 的方法)但best friend head prefect 係入咗佢願望之科 - 中大music, 估佢唔到。

另外,我諗有啲人會認為中西區名校無呢啲人,有個同學daddy mammy 都唔識講廣東話,初來香港,爸媽無學識,但爸爸每日都會陪女兒坐電車返學。

由電車路行到上羅便臣道英華課室,總共係行咗十五層樓already。(就係比見山更高 XD) 

佢一放學就讀書,讀到訓覺為止。一來香港就讀英華,廣東話都未識晒;爸媽完全無逼佢,叫佢唔使咁辛苦㗎,媽咪仲好興奮喺鏡頭前話「你看,你媽咪我無讀過書咪又好好的」

校長條線應該都係感動好多人的,所以唔劇透

又有一個同學讀書不錯,但好固執,自小希望入劍橋。佢細佬係自閉的,都幾嚴重。
so 你喺學校見到佢一個精靈醒目的女仔。
爸媽都好有愛,係教會中核心的成員,但女兒一直覺得無人理佢,所有愛都喺細佬到,佢媽咪都好內疚的,所以佢喺外邊識咗好多男仔收咗啲兵,離補咗佢家中得唔到嘅愛。

但其實每個女孩子deep down 都係好成熟的。
佢細個話要做份賺多啲嘅工,第時都係要佢養埋細佬。

到2019 問返佢,係咪仲諗住要養埋細佬,佢答「唔係我養佢,邊個養」

仲有另一個同學雀仔都好有趣,佢個角色就同上面的完全唔同。

英華女校係1900 年創校,但到2017 年先有第一個男校長。呢件事都好有趣。

講咗好多,但仲有好多細節我都無提及,所以...... 

我無諗過要寫呢個觀後感的,所以有啲細節可能記得不清楚,
不過誠意推介大家自己入戲院睇。好感動。

No comments: