Saturday, May 4, 2019

獨樹

大家都認識這棵樹
坐電車時會經過,去街市時會經過。
他是1994 年由有名歌手John Denver (唱Take me home, country road/Leaving on a jet plane 的那位) 親自種下的,編號623。當年綠化計劃是於灣仔一共種植1000棵樹,但原來要追查這些樹的下落並不容易。 同期就只有編號600,由彭定康種植的垂葉榕爲人所知。 那棵樹位於莊士敦道/盧押道交界,和昌大押對外。
現在25年了。
雖然這棵樹長得這麼靚,雖然他由明星種,但三層高的樹都是得個好迷你一平方米左右的立足之地,是怪不得香港的樹會倒塌的。
到時啲人又埋怨啲樹危險了。
雖然話香港人都係得咁細間屋住,但係咁高咁大的樹,成棵樹加上樹葉咁重,為了公眾安全,得咁少地方住係唔得㗎,樹博士在一次訪問中就話至少要兩米成兩米。
香港啲人都係,所以香港咁多人病囉。
你間「屋」又真係細咗少少。

呢棵樹就在我家小狗rosie 的動物專科醫院斜對面。
仲記得嗰次我帶rosie 去檢查, 有個婆婆也是早上放低她的貓貓,她最錫的貓貓,我們都是三點來接回動物。
她那隻是16歲的貓貓,牙齒流血,去了幾次其他獸醫都找不出原因。突然眼睛變矇了,發生得好快。於是被轉介去專科獸醫。
看得出全家都好錫她,護士帶她出來前,婆婆就在自責,怎麼這麼遲才知道「咁嚴重」,要被轉介往專科醫院照CT scan,整家人都不願意要婆婆一個人帶貓貓來。
大家本以為只是爛牙。她告訴我咁多隻貓,最錫係佢,因為佢最乖。
這時候,護士帶又精靈又嗲人的貓貓出來,護士說癌細胞已經擴散至整個口腔及腦袋,什麼都做不到了。加上她已十六歲。
讓她盡情地吃喜歡的東西和每天食止痛藥吧。

貓貓還好開心,好精神。
我和婆婆都沒想到是「這麼嚴重」。

在這裏住的樹就會見到好多呢啲事情,那是突然下大雨的下午,她帶住十六歲的貓回家,在大樹下等車。

大樹總在我們身旁,陪伴我們,為我們在傷心和開心時提供護蔭。他們也是活生生的生命,沒有樹木我們的生活會是怎樣呢,但我們總是這麼待薄他們,不是嗎?

假如我是樹木,我會想住在灣仔道與莊士敦道的交界嗎?
聽說灣仔係全香港最有錢的區。
呢棵樹由有名嘅歌手種在全香港最有錢的地段,肯定令其他樹木好羡慕。
初被派往那裹時,其他樹可能都幫他送行。
好像我有次在成田機場見到十個中學生男仔向一個要離開日本出國讀書的高中生送行,揮住手,看他在玻璃的另一邊坐着電梯離開,所有人都一邊揮手,一邊手機拍住ig story, 並呼叫着什麼,對方聽不到,但感覺得到的話。好鬼青春,唔知去邊,唔識英文嘅日本孩子去外國讀書,我係佢都驚...... 日本啲人自己都覺得自己好怪㗎嘛...

點知,住落先知原來無乜朋友,佢最近的一棵樹在大約幾十米旁 ,只能遠觀...

可能他心裹面不時唱 Take me home, country road... 想跟幾十米外那棵樹一齊私奔,但他們好難好難才可以溝通到,因為有一定距離。
想回到那裹?都看不清楚,因為四周大廈林立,放眼遠望,是真正的石屎森林,從前的故鄉山巒,滄海桑田,從這裹再看不見。

No comments: